I' nous z'a laissii Jean-Marie...

Eul' sam'di quate d'euch moi eud' mai deux mille vinte quate, Jean-Marie MOIRET nous a quittiis.

Ouaih, in est rud'mint trisse passqu'in l'connaissot bien. Chés gins d'euch villache bin sûr, surtout chés inciens. Feut dire qu'il a pos eu d'chance, il a attrapé l'polio in étint tiot.

In l'a connu quint' in étot élèves ach' Collège eud' Roisel. I' travaillot ach' secrétariat eud' gestchion.

Il étot poli, discret. Jamais i' n'a eu un mot eud' trop ni dit du ma' eud' quit'zin. In l'appréciot fort.

Avu' ène collègue prof' eud' maths, in allot l' vir din sin tiot bureau, quind' ch' collège il a été r'fait à nu. In étot solidaires, pour nous, i' méritot pos sin sort. Pis in aimot discuter avuc' li.

Et feut dire qu'il avot des dons et in attach'mint pour eul' langue picarde. Ouaih, euch' picard, ch'étot quit'kose pour li. Sin père Paul, il yi a donné eul' goût d'euch' parlache-là. Quint' il a été in ertraite, sin père a écrit des pages et des pages eud' souv'nirs, d'eusse vie, eud' chés camps, eud' chés métiis, d'euch villache eud' Ronssouo, pis ch' qu'il a vécu pindint chés deux grindes guerres. Eul' Commune, alle va i' rinde hommage in  juin. Cha ch'est békeup bin.

In est d'autant pus trisse pass'qu'in aurot eu ker euk' Jean-Marie  i' voit' ch' traval importint qu'in a foit pour mette in valeur sin père. C'est pour concherver ch' patrimoène eud' no' villache, et r'mette in lumière euch' picard.

Pis Jean-Marie oussi, il a békeup écrit, in frinçais pis in picard.  Il avot même été lauréat d'euch grind prix Edouard David, avuc' ses textes in picard. Pis il a été oussi publii dins des r'vues.

Il avot tint eud' qualités euch' Jean-Marie. Pis pourtint, il s'est jamais mis in avint. Qué homme !

Il a fallu qu'eul' sale maladie, alle fasse souffrir et nous l' prenne... Pas jusse. Mais in n'y put rien. Seuf dire à ses soeurs, Hélène et Agnès, pis à tout leu' famile qu'in l'avot ker , pis qu'in est à leu' côtés, pis qu'in l'oubliera pos, eud' tout' no' vie, euch' grind homme qu'il étot et qu'in put s'erdréchit d'euch' que li pi leu' père i' z'ont fait pou' l'richesse d'euch picard.

Merci pour tout'.