Blog

I' fait froéd pis cha récoeuffe, ch'est comm' cha qu'in quét malat'. I' n'a plein d'gins qui rindent leu boyeux, i z'ont ma à leu panche, i' z' éternuent, i' z' ont de l' fièfe, i' toussent. Bin sûr, i' n' sortent pus, i' sont toudis dins leu cahute, ach' fû. I' feut prinde l'air. In met s' casaque et pis in s'remue. Pis avuc chés microb', i' feut souvint s'laver ches mains, feut pon ête crapé. Et oussi acouter ch' médecin. Mi, i' m'a dit de m'faire vacciner, je l'ai acouté. In pus, l' grippe alle put ête mauvaise. Et l' Covid oussi. Si in s'croit pus malin que ch' médecin, cha sert à rin d'aller l' vir. Infin, chacun fait comm' i' vut...

Ouaih, quint' in est jonne, in s'occupe pos de rin. In fait l' fou, in va à l'école, in voit ses copains, pis vlà toute. Quint' in grindit, in n'acoute pus autant nos pareints, in s'amourache, in fréquente quo', in voit la vie in rose, in a pos d' soucis, in a la vie belle feut dire. Après, cha c'minche à ête sérieux. I' faut peinser à s' av'nir, appreinde un métii. Pis faut cmincher à compter ses sous, à s' faire un magot pou s'mette in ménache ou pour acater des meubes. In rigole pus tant, ou alors in est vit' dins l'imbarras. Là in a des responsabilités et ch'est pus à nos parints d' s'occuper d' nous, ch'est normal. Et pis, si in s'occupe trop d' nos copains, in est vite al' rue, pasqu'in put pos s' caser et pis faire l' java toudis. Et si in a des gosses, i' feut qu'in montre ch' l'exemple. Ch'est là qu'i' feut qu'in yeu rabache chés lçons qu' nos pareints i' nous répétint, qui nous fasint rire ou mette nos zius à l'invers, mais là in avot éne patarafe, pace que ch'respect, ch'étot tout'. Poleur, chés gins i' n' respectent pus rin, même euch' Maire et pis ch'curé. Ch'est pour cha qu' l' monde i' va d' travers, in a laissé chés valeurs fout' l' camp. Pis quind ch'est parti, trop tard pour erdréchi. Qué malheur !...

Ch'l'hiver, i dure. In est ingèlé. In a békeu eud'neige, fallot s'in douter. Pi inn'n'a cor'. Au matin, j'ai fait attintion in déneigeant chés marches eud' la Poste, épaiches eud'glache, faudrot pos qu'chés gins y glichent. J'ai yeu froéd à mes piids, éj'sus po cor' rékeuffé.

Mais feut dire euque cha fait des bieux paysages. T'nez, y a même des gins qui sont des artistes, vlà ène oeuvre d'art, ouaih ouaih...

Merchi eul' fame, d'avoir partagi cha avuc nous !

A Ronssouo, in a ène cantine pou chés gosses eud' l'école.

J'ai été vir ch'menu du jour. I vont mingi deul' soupe, sûrement avu des patates eud' dins, du gaimbon al' sauce tomate, des noulles avu du fromache, du pain de ch'boulingi, pis cor' deul' tart' a pommes. Bin sur, i vont po boire eud' pinar, mais eud'd'ieu.

I vont éte goulaffe a éte nourri comme cha. Po à s'plainde. Après i pourront juer, pi ben acouter ch'maîte et pi apprinne.

Ch'temps, i' est détraqui. In déchimbe, in a tout eu : in avot du vint, deul' timpête, deul' pleuve, il a même drachi, et pis cor' eud' l'orache, un peu d' solel...

Pis eul' s'maine-chi, in a eu jusqu'à moins 9 degrés. Cha glissot, il aurot po fallu valdingui su l' glache.

Min tiot frère, il est dins l'Aube, is ont eu deul' neiche, quéques chintimétes. Ouaih, là-bas, i fait toudis pus froéd.

Croyez-min, vaut miux rester ach'fu et pis mingi ène bonne assiette eud' soupe.

In parlant d' cha, 'reusemint, j'avos fini d'arrachi mes carottes et mes bett'rafes diminche, cha pos été perdu. Surtout avu ch'ma qu'in a à faire du gardin.

Bien intindu, chés viux, i sont pus partants pour ène bistoulle, mais cha cauffe...

Euch' jeudi 11 jinvii, eul' galette eud' chés ros, avu ch'club eud' chés viux, chés gosses eud' l'école et leu grind-parints.

Nos gins,

In vous souhaite eune bonne année et pis ène bonne santé.

In vous a ker, alors faites attintion à vous !

Eud' nos jours, tout' y va mal, alors feut garder eul' moral, et pis ête bien insembe et solidaire, cha coûte rien et pis cha rind heureux. Ch'est pos grind cosse.

Ch'Maire, et pis euch' Consel Munichipal, i vous disent leu voeux pour ène bonne année et pis ène bonne santé, pour vous pis vos famile.

À bientôt eud' vous vir' al Mairie, din ches rues et à chés manifestations !

Et pis nous, in s'eurtrouvent din ch'Ronssoyen, feut que j'sache chés nouvelles, et pis no' Maire et chés Conseillis, iz'ont sûremint cor' des projets qui valent eul'coup.

À dé !...

Bienv'nue à tertous !

El Picardie, alle est pu' su chés cartes, mais alle existe toudis.

Nos incêtres, iz' avint des valeurs. Et pis ène langue ki faudrot pos oublii. Ouaih, in est Picards !

Not' Maire, Ch'Maire eud' Ronssouo, Michel Bray, il a eu ène bonne idée avu ch'Circuit eud' chés écrivains.

Quind Ch' l'agince d'el région pour el langue picarde, avu Olivier Engelaere, alle l'a contacté, il a sauté su l'occasion, celle eud' ermette in mémoire chés grinds hommes eud' no' pays.

In 2023, ch'est Maurice Thiéry qui a été mis à l'honneur. Il a fait parler eud' li avu ses live in picard. Nous y vla...

D'abord, cheux qui s'sont déplachis, i' n'ont pos perdu leu journée, pass' que ch'étot békeu bien.

Inn'a fait ch'l'homme-là, des conférinches, des histoères, des lives, et pi in n'sait pos cor' tout'.

Alle Mairie, i vindent même in live eud'li, avu eud'dins in aperçu deuch'traval deul'secrétaire eud'Mairie qu'al a voulu connaîte ch'l'célébrité-là et pis essayer d'artrouver ch'traval qu'il a fait, ch'est incroyabe. Il étot pos fainéant. Dire qu'il est eud' no' coin...