Blog

Vous savez, mes gins, in a vécu des momints forts chés 11 et 14 juin. Tout cha in mémoére eud Paul Moiret. Sin picard i' vivra toudis, cha ch'est sûr. Bin sûr, y a eu éne exposition ach' l'église, qui racontot eusse vie. Pis éne chélébration, avuc s' famile, mais auchi ch' l'Abbé Brunel eud' Péronne, Dominique Langlet, d'euch l'église protestante unie eud' France, euch' l'Agince Régionale pou' l'picard, pis Françoise Desmaret, eul' célébrité qu'alle a éne émission su' France bleu, eul' radio. Pis d'eutes personnes importintes. Ouaih, ch'est bieu eud' vir tout cha dins un tchot pays comme eul' not'.

Après cha, dins l'soirée, y a eu un r'pas picard, in a rimpli s'panche pi in a rimpli s'caboche avu' tout c'que Françoise alla a raconté pis nous a appris. Faut bin s'intraîner à parler picard.

Feut simplemint dire qu'ch'étot formidabe.

Eul' vindredi, y a eu chés discours eud' chés officiels, ch'est normal, pis in a cor' ergardé ch'exposichion. Chés gosses eud' l'école, i' z'ont canté in picard ; ah, ch'étot réussi, i' z'ont du talint. Après in est parti faire euch circuit dins chés rues, alle Mairie, ach' Chinmétiére, ach' l'église, pis à s'mazon. Brigitte Glowacki, avu' s'n'habit eud' picarde, pis René Degenne, i'z'ont lu des textes in picard eud' Paul Moiret. Après cha, in a bu in keup. Pis in a pu découvrir euch' live euk' l'Agince a publii. Eud' dins, y a 110 poèmes eud' Paul Moiret. In bieu live. Faut bien ermercii cheux qui ont donné leu temps pour ch'résultat-là : Olivier Engelaere, d'euch l'Agince, Carole Morel, Sylviane Witz, pis Jean-Pierre Darras. Merchi aussi à Pierre Leroy et Jean-paul Prévot pou' l'mise in valeur d'euch l'exposition. In a deul' chance eud' vous avoér. Merchi !!!

Eul' sam'di quate d'euch moi eud' mai deux mille vinte quate, Jean-Marie MOIRET nous a quittiis.

Ouaih, in est rud'mint trisse passqu'in l'connaissot bien. Chés gins d'euch villache bin sûr, surtout chés inciens. Feut dire qu'il a pos eu d'chance, il a attrapé l'polio in étint tiot.

In l'a connu quint' in étot élèves ach' Collège eud' Roisel. I' travaillot ach' secrétariat eud' gestchion.

Il étot poli, discret. Jamais i' n'a eu un mot eud' trop ni dit du ma' eud' quit'zin. In l'appréciot fort.

Avu' ène collègue prof' eud' maths, in allot l' vir din sin tiot bureau, quind' ch' collège il a été r'fait à nu. In étot solidaires, pour nous, i' méritot pos sin sort. Pis in aimot discuter avuc' li.

Et feut dire qu'il avot des dons et in attach'mint pour eul' langue picarde. Ouaih, euch' picard, ch'étot quit'kose pour li. Sin père Paul, il yi a donné eul' goût d'euch' parlache-là. Quint' il a été in ertraite, sin père a écrit des pages et des pages eud' souv'nirs, d'eusse vie, eud' chés camps, eud' chés métiis, d'euch villache eud' Ronssouo, pis ch' qu'il a vécu pindint chés deux grindes guerres. Eul' Commune, alle va i' rinde hommage in  juin. Cha ch'est békeup bin.

In est d'autant pus trisse pass'qu'in aurot eu ker euk' Jean-Marie  i' voit' ch' traval importint qu'in a foit pour mette in valeur sin père. C'est pour concherver ch' patrimoène eud' no' villache, et r'mette in lumière euch' picard.

Pis Jean-Marie oussi, il a békeup écrit, in frinçais pis in picard.  Il avot même été lauréat d'euch grind prix Edouard David, avuc' ses textes in picard. Pis il a été oussi publii dins des r'vues.

Il avot tint eud' qualités euch' Jean-Marie. Pis pourtint, il s'est jamais mis in avint. Qué homme !

Il a fallu qu'eul' sale maladie, alle fasse souffrir et nous l' prenne... Pas jusse. Mais in n'y put rien. Seuf dire à ses soeurs, Hélène et Agnès, pis à tout leu' famile qu'in l'avot ker , pis qu'in est à leu' côtés, pis qu'in l'oubliera pos, eud' tout' no' vie, euch' grind homme qu'il étot et qu'in put s'erdréchit d'euch' que li pi leu' père i' z'ont fait pou' l'richesse d'euch picard.

Merci pour tout'.

Mes gins, y a eu in grint' évènemint hier - in étot vindredi 12 avril. I' avot du mon.ne alle salle des fêtes. Ouaih, in signot eul' Charte pou' garder no' lanque picarde.

Feut dire, chés traditions, cha vaut eud' l'or. Ch'est nos rachines. Pis comme euch' Maire i' tient à sin patrimoine, alors il intraîne avuc li plein d' gins : sin Consel Munichipal, chés maîtresses d'école avu z'infants, pis tous cheut' qui veulent bin. Ch'est pus que formidabe.

Tout ch'villache étot invité.

Y avot cheut' qui travallent ach' l'Agince del Région pour el Langue Picarde, ch'est à dire : Anne Tiberghien, eul' Présidinte, Françoise Desmaret ,eul' Vice-Présidinte pou' la Somme - alle fait ène émission su' France Bleu in picard, ch'est békeup bien - et Olivier Engelaere, euch' Directeur, fort actif dins tous chés projets. Faut pos oublii non pus René Degenne - i' resse à Ronssouo - avu' sin parlache in picard ; in pus, il a canté ch'l'Andoulle : il a eu grind'mint eud' succès, pis in a bin rigolé.

Chés Maires eud' Limpire, Thierry Cornaille, et d'Épy, Jean-Michel Martin, étint présints, cha fait plaisir.

Chés infants i' z'ont canté des canchons in picard, i' sont doués. Merchi à eux pou' leu talent et leu' bonne humeur, et merchi à chés maîtresses, qu'in put vinter chés qualités d'apprinde chés gosses.

Ch' Maire, eul' Présidinte Anne Tiberghien, pis Maryse Fagot - in put mette in avint tout ch' boulot qu'alle fait pou' tout l'monte - i' z'ont signé eul' Charte.

Après cha, chés gosses i' z'ont porté eul' pincarte "Ronssouo", qué fierté !

In a pris des images avuc' tous chés Conseillis présints et l' tchote qu'alle travalle à l'école.

Pis ch'est pas tout cha, mais il a fallu rincer chés gosiers avuc des verres, pis des chukes pou' chés infants.

Ène sacrée réussite ! Bravo à tertous !

Eul' sam'di 16 mars, y a l' fameuse course à vélo in hommage à Max Cottrelle. Il a été Maire deuch' villache. Li pi s'femme, i' z'ont laissii leu biens al' Commune. Chest un bieu gesse. Ch'est pour cha qu'eul' Commune alle tient à yeu rinde honneur. Feut jamais oublii tous chés gins-là.

In a del' peinne pou no camèrade Sylviane. Vous savez, Sylviane Witz, qu'alle a traduit chés texes eud 'Maurice Thiéry, no écriveu patoésin. Alle vient eud' perde s' mére. Ch'est sûr, alle avot chent in ans, mais eune mére, ch'est tout', ch'est l' mémoére de l' famile, ch'est ch' pus bieu trésor sur terr'. Et pis, même si des fos nos parints i' sont faibes ou diminués, ch'est tout d'même nos rachinnes. Des fos, i' suffit eud' cha pou' qu' chés infints i s'battent'chin, ou bin qu'i s'rappellent qu'i z'ont des aïeux. A quo bon...

In pinse bin à ti Sylviane !

Cha y est, au soér ché gosses i' vont ête in vacances. I' sont raflakis, i' vont pouvoér s'érposer, prinde leu temps. Pis si i' prénne l'air, i' vont miux dormir. Bin sur, i' va pos falloér qu'i' passent leu nuit su l' tablett' ou bin dins chés rues. I' feut pos non pus qu'i' laissent leu carnasse accreuchi ach' cleu, pasqu'in oublie vit' cho qu'in apprin' si in fait pos travaillii sin ciboulot. Y a quit' énnées, y a kit'z'in qu'a dit qu'i' fallot pos donner des dvoèrs à s'mason. Là, chés parints, i' z'ont art'nu. Comme chi lire in live ou réchiter chés l'çons pouvot faire du ma. Ch'est l'monne à l'invers. Ch'est la débindabe comme in dit. I' vont putôt dévnir des baudets ; i' pourront s'taper la honte. Après cha, i' peuvent juer ou vir leu camèrades. Ou bin aller à l' bibiothéque. Justemint, y a in bon live pou chés jonnes qu'Aurélie Valognes alle a écrit, "Clovis et Oups", avuc békeup d'images mais pos granmint d'écriture. Pis plein d'eutes ouvraches pou chés grinds pis chés tiots. Ch'est simpe, ch'est ouvert tous les mercrédis intér 15h30 et 18h00. Y a pos d'quo s'innuyi. Bonnes vacances et érposez-vous bin !...

Eul' 14 févrii, ch'est l' Saint Valintin, eul' fête eud' chés amoureux. Mais attintion, ya pos qu'euch' jour-là qu'i feut avoèr ker eus'moitii. I' feut l' faire tous les jours, sinon ch'est du cinéma. Après cha, ben sûr qu'i' n'a pos eud' ménaches sins nuaches. Mais euch' jour in question, in put foère un effort et akater ène fleur. Ch'est parel, ch'est ch'gesse qui compte, i' s'agit pos eud' dépinser chou qu'in a pos.

Vous savez, cha r'monte à loin eul' fête-là, et ch'étot pos catholiqu'... j'vas vous expliqui.

In fait', du timps eud' chés Romains, y avot chés "Lupercal'", ène fête païenn'. Chés hommes, i parcourint eul' ville in fouettant chés femmes su' leu panche avu' des lanières pou' qu'alles puss' avoér des gosses. In dit oussi qu'chés hommes, i' z' déshabillint et pis i' mettint eul' piau deul' bête qu'i' z' avint sacrifii, in mouton ou in kien, pasqu'i' croyint que comme cha, i' serint fertil'.

Ch'étot ène fête populaire. Mais feut savoér euq' chés chrétiens, i' z'ont toudis voulu eul' l'interdire. Alors i' z'ont invinter eul' Saint Valintin, in peu in l'honneur deuch' prête Valintin eud' Rome, qui mariot des coup' in s' muchant. Ch'étot dins l'Intiquité.

Pis avu' Chaucer, in Inglais, eul' Saint Valintin, alle a pris ène valeur romintique. Feut lire "Euch' Parlemint eud' chés oésieux". Pasqu'à l' date-là, eul' 14 févrii, chés oésieux, i' c'minchent leu saison des z' amours. Shakespeare, in eute poèt' Inglais, i' a oussi mis sin grin d' sel.

Quint à l' prémiére carte eud' Saint Valintin, alle date eud' 1415. Euch' Duc d'Orléans, qui étot prisonnii dins l'Tour eud' Londes, il l'a invoyi à s' femme.

Bin sûr, pindint la guerre, chés gins, i' s'invoyint des tchots mots, cha fasot békeup d' bien à chés souldats.

Pouleur, feut qu' cha rapporte des sous...

Eul' s'maine-chi, in a perdu in grin' t'homme, euch' Major eud' gindèrmerie Fabrice Gaveriaux. Ch'étot in gars bin comm' i' feut, droét, conscieinchieux, pis travailleux. In a yeu l'occasion de l' cotoyi quint' il étot à Roézel et à Péronn'. In sacré gindèrme ; attintion, dins l' bon sins'. Sin coeur il a lâchi, qué malheur ! In plaint s'femmme pis ses gosses, ch'est pos permis. Malheureuz'mint, in n'y put pos grin' cose...

Inn' n'ont ène bonn' chés gindèrmes, avu tous chés galoupiots qui font d' travers, chés bindits. Et i' sont eud' moins in moins respectés. In est dins in drôl' eud' monde. Feut s'accrochit pis ête vigilant. Et pos oublii eud' fermer ses portes et d' pos laisser traîner sin sac, ses bijoux ou s' n'argint.

In tout cas, ène chose est sûre, ch' l'homme-là, i' rest'ra dins nos mémoére... Merchi à li !